Pinagpapaliwanag sa loob ng 15 araw ng Sangguniang Panlungsod ng Puerto Princesa si Kapitan Prince Russel Gloriani ng Barangay San Miguel.
Ito ay dahil sa isang Administrative complaint na inihain ng isang Philip Balmores ng Barangay Bacungan sa Lungsod.
Nagsimula ito dahil sa hindi umano paglalabas ng punong barangay ng Certificate to file action sa insidente na kinasangkutan ng nagreklamo noong Nobyembre 2022.
Ayon sa opisyal, nagkasundo na kasi sa barangay si Ginoong Balmores at ang nakabangga sa kotse nito noong una subalit bandang huli ay nagpasya raw ito na kasuhan na lang ang nakabangga dahil sa hindi pagbabayad ng balanse.
Sa lebel ng barangay ay sinikap naman umano ng opisyal na pakiusapan ang respondent ni Balmores na magbayad ito ng balanse sa danyos.
Gayunman, nilinaw ng opisyal na walang usaping pera sa reklamong isinampa laban sa kanya at nakahanda siyang sagutin ito sa City Council.
