GIANGKON karon ni Kagawad Franklin Gacal Jr. posibleng magpahigayon siya og investigation in aid of legislation kalabot sa COA findings, asa daghan nakit-an nga sipyat sa paggamit og pondo alang sa COVID-19 response sa LGU-GenSan.
Segun ni Gacal nga wala pa niini nabasa ang tanang panid sa COA reports nga anaa sa 284 pages apan giangkon nga first time sa history sa GenSan nga halos dul-an 300 ka panid ang findings sa COA, nga nagpasabot nga may iregularidad nga nakita.
Usa sa nasayran ni Gacal ang may kalabutan sa bugas nga gipalit sa LGU apan kini ang gibayran nang daan bag-o pa gi-deliver nga dakong kalapasan sa patakaran sa COA.
Lakip usab nga sayron ni Gacal ang alokasyon nga bugas ngadto kanila nga mga konsehal, asa migawas nga siya ang may pinakadaghan nga alokasyon subay sa maong report.
Sutaon usab niini ang mga donasyon nga gihatag sa LGU sa mga kompanya, organisasyon, ug mga pribadong indibidwal nga wala sumala pa nabutang sa financial book of account. Gusto ni Gacal nga muhimo og imbestigasyon kalabot niini aron dili na masubli sa umaabot nga panahon.
