USA ang patay sa 2,154 ka dogbites sa General Santos City sugod Enero hantud Hulyo sa kasamtangan nga tuig sa talaan sa City Veterinary Office.
Sa kumpermasyon sa labaw sa City Veterinary nga si Dr. Antonio Marin taas gihapon ang mga kaso sa napaakan og iro sa GenSan ug kasagaran mga latagaw nga hayop ang nakapaak sa mga biktima, mao nga subli silang nagtagbo ug gitakda ang dugang pa nga dog vaccination.
Subay sa talaan sa Animal Health and Disease Control Division sulod sa pito ka bulan mokabat na sa 22,060 ka mga iro ang nabakunahan, 902 ang na-impound samtang 2,154 ang mga napaakan ug usa ka biktima ang namatay nga gikan sa Barangay Apopong kaniadtong Abril 2021.
Samtang basi sa Rabies Surveillance Report wala mabakunahan ang mga iro nga nakapaak, adunay binuhi sa balay ug aduna usab nga latagaw nga iro nga nakapaak.
Sa massive vaccination bag-o lang nahuman sa Barangay Calumpang ug ang schedule karong semanaha sa Barangay Bula.
Gidugang ni Marin nga bisan may pandemya dili sila mo-undang sa vaccination gumikan taas gihapon ang kaso sa dogbites ug wala gihapon nakontrola ang rabies sa GenSan. ( Ever Diazon)
