GIKASUBO ni Kagawad Atty. Franklin Gacal Jr. ang pagkawala sa iyang gihuptan nga Committee on Finance atol sa miaging session sa konseho.
Segun niini nga klaro matud pa nga dili maayo ang tumong sa paghulip kaniya sa maong posisyon, asa wala pa kini gitugutang makaapil sa diskusyon tungod atua kini sa Amerika.
Gidudahan pa ni Gacal ang motibo sa pagkawala sa iyang komiteba tungod nabalik man sa tanang konsehal ang ilang mga committee chairmanship gawas kaniya ug usa ka komiteba nga mao ang agriculture nga gikan kang Kagawad Brix Tan naadto kang Kagawad Richard Atendido.
Gibutyag usab ni Gacal nga iyaha na lang gidawat ang duha ka komiteba nga gitawag niining ‘dead committees’ sama sa Committee on Human Rights ug Recognizance aron adunay trabaho sa SP.
Samtang gitambagan na lamang ni Gacal ang bag-ong chair sa Committee on Finance nga si Kagawad Vivencio Dinopol nga dili mahimong puppet sa local chief executive ug magtuon pag-ayo sa maong komiteba. Sa Agosto 25 pa muuli sa nasud si Gacal gikan sa Amerika ug magkwarantina pa apan gusto na nga makaapil sa supplemental budget deliberations ug ubang hisgutanan.
