Nagapabilin sa kustodiya sang Maayon Municipal Police Station ang isa ka bantog nga lider sang Communist Terrorist Group (CTG) nga naga-operate sa banwa sang Maayon, Cuartero kag Tapaz, matapos nadakpan sang mga otoridad kahapon sang aga, Hunyo 25 sa Sitio Ensewalan Brgy. Tapulang Maayon, Capiz.
Matandaan, ginkilala ang nadakpan kay Francisco Balois alyas “Tonying”, 61-anyos, lider sang Squad 2, Madia-as Dos, Central Front, Komiteng Rehiyon – Panay kag residente sang Brgy. Katipunan sa banwa sang Tapaz apang didto na nagapuyo sa Sitio Ensewalan Brgy. Tapulang, Maayon.
Ang warrant of arrest sa kaso nga Murder kag paggamit sang armas-luthang nga indi lisensyado ang gin-isyu kag ginpermahan ni Judge Daniel Antonio Gerardo S Amular, Regional Trial Court, 6th Judicial Region, Branch 21, Mambusao, Capiz napetsahan Nobyembre 3, 2011 kag wala sang piyansa nga ginrekomendar ang korte.
Narekober sa paghinakop ni “Tonying ang isa ka unit sang caliber. 45 pistol; lima ka magazine nga loaded sang 32 ka live ammunitions; isa ka fragmentation grenade kag isa ka handheld radio.
Magapangatubang naman ini sang sampaw-sampaw nga kaso nga ginakalakipan sang Multiple Murder and Frustrated Murder; Robbery in Band; Serious Illegal Detention Rebellion and Direct Assault kag madamo sang iban pa. | Judy Ann Juare
