NAKA-MONITOR lang ang mga Job Order Workers sa Local Government Unit sa Gensan kon kanus-a mahatag ang ilang sweldo sa bulan sa Desyembre 2021.
Sa kumpermasyon ni Purok Kagawad Boyet Bagatao ilahang nadunggan sa balita nga anaa na ang opisyal gikan sa Bureau of Local Government Finance aron ma-asikaso ang financial transaction sa syudad ug makatuboy og temporaryong treasurer.
Nanghinaut si Bagatao nga ma-confirm na dayon sa konseho kon si kinsa man ang matuboy aron nga madawat na nila ang ilang sweldo sa Desyembre 2021, nakabalita usab siya nga aduna nay mga departamento nga nakadawat na og sweldo apan sa ilaha sa Barangay Affairs wala pa.
Gidugang ni Bagatao nga ang ilang estado karon, nahuman na sila sa pag proseso sa ilang papelis alang sa renewal sa mga Job Order Workers, ang rekositos nga ilang gigastuhan ang alang sa medical examination nga P700-900 pesos ,P500 pesos sa Bureau of Internal Revenue ug drug test nga P250pesos.
Samtang gikumperma usab sa usa ka regular nga empeyado nga si Rolan nga wala pa gihapon nila nadawat ang ilang sweldo alang sa petsa 15 sa Enero nga unta ilang dawaton petsa 20 sa Enero, mao nga nanghinaut si Rolan nga napaspasan ang proseso sa pagpungko sa taga BLGF. I Ver Diazon
