GINAHIMO pa ug gina-polish ang Implementing Rules and Regulations kun IRR sa ordinansa nga nagahatag og birthday gift ug social pension sa mga senior citizens sa GenSan.
Kini ang gikumpirma ni Josephine Mendoza, bag-ong labaw sa Office of Senior Citizens Affairs o OSCA-GenSan nga gina-consolidate pa nila ang listahan sa ilang buhatan, City Social Welfare and Development Office, ug City Planning aron makapagawas og masterlist alang sa maong mga benepisyo sa mga tigulang.
Kahibaluan nga naaprobahan sa konseho ang ordinansa kalabot niini ug kinahanglan ang IRR aron mapatuman.
Giklaro usab ni Mendoza, nga ginalingkuran sa tulo ka buhatan ang masterlisting sa mga senior citizens aron makuha ang ensaktong ihap ug hapsay nga mapatuman.
Sa karon daghan matud pa ang ginakonsidera sa paghimo og IRR mao nga medyo malangan pa ug hangyo ni Mendoza sa mga senior citizens dugangan pa ang pasensya.
Sa pagbana bana ni Mendoza anaa sa mga 28 mil ka mga senior citizens ang anaa sa GenSan apan ang maong ihap ang kinahanglan pa nga makumpirma.
