Daina E. Gerona
Nakatalana sa karon nga adlaw ang pag-inspeksyon sang katapo sang Bureau of Fire Protection Kabankalan sa mga electrical wiring sang tagsa ka mga kubo, kiosko kag sa kabilugan sang Kabankalan Public Plaza, kadungan sa pagsugod sang silibrasyon sang ika-27 nga annibersaryo ukon charter day celebration sang syudad.
Base sa interbyu nga ginpatigayon sang Brigada Kabankalan sa kay Acting Fire Marshall SFO3 Restito C. Salon sang BFP-Kabankalan nga ang katuyu-an sini amo agud nga malikawan ang posibilidad sang sunog sa sulod sang kalawigon sang silibrasyon ilabi nga indi malikawan nga madamo nga mga appliances kag iban pa nga mga kagamitan ang ginagamit sa Kabankalan public plaza nga nagakinahanglan sang nagaka-igo nga suplay sang kuryente.
Palayag pa ni Salon, nga magadeploy man sila sang pila ka mga BFP personnel sa plaza, subong man ipahamtang ang isa ka Fire Trunk nga puno sang tubig kag isa ka ambulansya sugod karon nga adlaw tubtob sa Agosto 2 sa plaza samtang ang isa naman ang standby for operations sa inkaso nga mga insidente sang sunog sa iban nga bahin sang syudad.
Nagbilin man ini sang pahanumdom sa tagsa ka mga Kabankalanon subong man dumulu-ong agud malikawan ang mga insidente magluwas sang sunog kaangay sang kinawatay.
Nahibalu-an nga ang amo nga silibrasyon ang may tema nga Kabankalan Kabankalan at 27: Pag-isa sa Gugma, Pagkabalaka kag Pag-asa nga magalwig sa sulod sang walo ka adlaw tubtob sa Agosto 02.
