Ginkumpirma ni Police Captain Aubrey Ayon, COP it Tangalan Municipal Police Station nga may natabo nga insidente it ‘vote buying’ sa nasambit nga banwa.
Sa interview it BRIGADA NEWS FM KALIBO kay Capt. Ayon, gin-abisuhan eon it Comelec Tangalan ro nasambit nga complainant nga mas mayad kung mismong ro tawong nakabatun it kwarta halin sa kandidato ag mismong nakasaksi, ro mag atubang sa Comelec para ma-establish ro insidente it ‘vote buying’.
Pero owa man segun it ginpresenta nga tawo ro complainant.
Ginklaro ni Ayon nga kung ginahambae nga ‘vote buying’, kaakibat kara ro ‘vote selling’ nga ro buot hambaeon, kung may bumakae, may nagbaligya man it anang boto.
Sa parte segun nanda sa PNP, may una sanda nga ‘Kontra Bigay’ Committee kung siin, gina-validate nanda kung matuod ro report, para maipasueod raya sa Election related incident.
Kung ‘in flagrante delicto’ o caught in the act ro insidente it vote buying, hay bukon eon it kinhangean it validation.
Samtang, nagpasaeamat ro Tangalan PNP bangud generally peaceful ro katatapos nga Barangay ag Sangguniang Kabataan Elections 2023.
Nag umpisa man segun kay Capt. Ayon ro andang deployment para sa UNDAS 2023 ag nagbutang eonman sanda it Police Assistance Center katuwang ro Coast Guard, nga maga alalay sa mga magaagto sa sementeryo ag sa mga biyahero nga magaagto sa isla it Boracay bangud long weekend. // ANN DESLENE SALAZAR
