NAGA CITY—Arestado ang Incumbent Punong Barangay ng Dahat, Lagonoy Camarines Sur matapos mahulihan ng iligal na droga.
Kinilala ang suspek na si Barangay Captain Chiz Navea y Hanapin, 52 anyos, may asawa at itinuturing bilang number 3 sa Municipal Drug Watch List ng PNP.
Ayon kay PLT Jaime Enciso, DCOP ng Lagonoy MPS pasado alas-10:00 ng gabi nitong lunes nang isilbi sa bahay ng opisyal ng Barangay ang Search Warrant na ipinalabas sa sala ni Hon. Ma. Angela Accompañado-Arroyo, Executive Judge ng RTC San Jose, Camarines Sur para sa kasong may kaugnayan sa RA 9165 o Comprehensive Dangerous Drugs Act of 2002.
Sa paghahaloghog ng mga operatiba, narekober ang limang pakete ng shabu na may tinatayang halaga na aabot sa P170,000.
Isinagawa ang operasyon sa pinag-isang pwersa ng PDEA Masbate, PDEA Camarines Sur, PDEA ROV/RSET, Lagonoy MPS MDEU at Camarines Sur PMFC.
Bunsod nito mahaharap ang suspek sa kasong Illegal Drugs.
