Matapos masakote ang limang suspek sa likod ng ‘Mark Nagoyo’ BDO hacking incident, kinumpirma ng National Bureau of Investigation na tinutugis na rin nila ang iba pang suspek na kasabwat ng grupo.
Ayon kay NBI cybercrime division head Victor Lorenzo batid na nila ang pagkakakilanlan ng iba pang mga suspek.
Ibinunyag din ni Lorenzo na balak ulit ng mga hacker na makapang-biktima kung saan target naman nito ang isang kumpanya ng banko.
Agad naman umano nilang nasabihan ang banko sa planong ito ng mga kawatan.
Kumpiyansa si Lorenzo na mahuhuli din nila sa lalong madaling panahon ang iba pang sangkot sa BDO hacking incident lalo’t may hinahawakan na silang pangalan ng mga ito.
Nabatid na unang naaresto ng NBI ang limang suspek kabilang na ang dalawang nigerian national sa isang entrapment operation sa Mabalacat City, Pampanga noong Enero 18.
