Gin-athag sang Department of Social Welfare and Development nga wala gina-aplayan ang Pantawid Pamilyang Pilipino Program (4Ps) agud mangin benepisyaro kundi ginapadulungan ini sang Listahan survey agud kuhaon ang complete background sang kada pamilya.
Ini ang ginpahayag ni Mary Grace Solinap, 4Ps Provincial Link sa ginhiwat nga media conference sang damlag lang.
Suno kay Solinap, sa tion nga maagyan sang listahan survey ang puluy-an sang isa ka pamilya, ginakuha diri ang kompleto nga impormasyon sang tanan nga miyembro sang panimalay kag ila ini gina-endorse sa regional kag ipasaka naman sa national kun sa diin didto gina-validate ang makasulod sa nasambit nga programa.
Aminado man ini nga nabudlayan sila nga padulungan ang mga panimalay nga yara nahamtang sa nabukid nga lugar gani nagpanugyan ini sa mga pamilya nga indi maagyan sang survey nga magpadulong nalang sa ila talatapan agud nga malista kag ma-priority. | Judy Ann Juare
