Tungod sa kahubog ug kagutom sa 29-anyos nga lalaki, nangawat kini og hybrid nga mga manok igtatari nga mobalor og 50,000 pesos matag usa.
Giila ang dinakpan nga si Alyas Budoy.
Nahitabo kini pasado ala una niadtong Hunyo 10 sa buntag sa Gate 1, Alta Vista, Poblacion Pardo, dakbayan sa Sugbo.
Samtang gasusi ang caretaker sa maong manokan, naatlan ang maong kawatan nga adunay dala nga sako diin sulod niini mao ang tulo ka mga manok.
Gibutyag sa maong dinakpan nga gigutom siya human gainom hinungdan nga nisulod og nangawat kini og mga manok. Plano pa niini nga isugba ang usa sa mga manok og ibaligya ang laing duha ka mga manok.
Gigukod kini sa caretaker inabagan sa mga BSPO ug nasikop kini. Dali dayon kini nga gidala sa Inayawan Police Station arun pasakaan og kasong pagpangawat.
