BALETE, AKLAN—Matapos nga ma-classify it Department of Health 6 bilang una sa “high risk” level do banwa it Balete, Aklan, nagpatuman do LGU it mas hugot nga quarantine rules agud nga mapunggan do pagkalat it COVID-19.
Sa pakipag-angot it Brigada News FM Kalibo kay Mr. Apolinar Cleope, consultant to the Mayor, ginpahayag kara nga insigida nga nagpaguwa it Executive Order No.21 si acting Mayor Patrick Lachica nga nagabawae sa mga residenteng magguwa mag-eowas eamang sa mga Authorized Persons Outside Residence (APOR), may mga trabaho, may importanteng transaksyon ag ginapatuman man do “home limitation” kung siin sangka miyembro eang it pamilya do ginapasugtan nga makaguwa agud nga magbakae it kinahangeanon sa sueod it baeay ag naging epektibo raya ku Mayo 31 hasta sa June 15, 2021.
Dugang pa kara, nagpaguwa man it Executive Order No.22 kaangot sa paglimita sa mass gatherings sa nasambit nga banwa ag bago magpatigayon it pagtililipon hay kinahangean anay nga magbuoe it clearance sa barangay agud nga mainspeksyon do lugar kung siin pagahiwatan it okasyon.
Samtang, ginpaeawig man do curfew hours nga nagaumpisa it alas-8 it gabii hasta it alas-5 it agahon ag ginapatuman do liquor ban.
Nasayuran nga as of June 01, 2021, do Balete hay may una nga 71 total cases ag 24 pa kara do aktibong kaso. // SHERRY ANNE REUNIR-VIDAL
