LEGAZPI CITY – Dai nakapalag sa mga otoridad an 40 anyos na habal-habal driver sa drug buy-bust operation sa Purok 2, Brgy. Paulba, syudad nin Ligao, Albay.
Binisto ining si alyas “Caloy”, warang agom asin residente kan kaparehong barangay.
Naarestar ini sa paagi kan nasambit na operasyon na kinondusir kan mga personahes kan Ligao City PNP sa pakikipagtabangan sa PDEA Bicol.
Sa operasyon kontra sa suspek, nakumpiksar an buy-bust item na sarong sachet nin pinagtutubudang “shabu”.
Nakua pa saiya an duwa pang sachet nin kaparehong item na may timbang na poko mas omenos 0.50 grams asin may pigkakalkulong kantidad na PHP3,400.
Kaibahan pa sa mga narekober an lighter, itom na pitaka, sarong PHP500 bill na buy-bust money asin itom na Rusi Macho na warang nakabugtak na plate number.
Nasa kustodiya na ini kan nasambit na hepatura para sa magkakanigong disposisyon.
