Humarap sa unang pagkakataon sa Kamara ang dismissed Mayor ng Bamban, Tarlac na si Alice Guo para sa ika-anim na pagdinig ng Quad Comm hinggil sa isyu ng illegal Philippine Offshore Gaming Operators o POGO.
Mula sa PNP Custodial Facility sa Camp Crame ay dumating sa Kamara si Guo bago mag-alas nuebe ng umaga.
Inimbitahan din sa imbestigasyon si Cassandra Li Ong, ang legal representative ng Lucky South 99 at sinasabing stakeholder ng Whirlwind Corporation.
Sa kanyang opening statement, binigyang-diin ni Quad Comm Chairman Robert Ace Barbers na hindi magpapa-apekto ang mega-panel sa mga akusasyon na inaabuso nito ang kapangyarihan.
Responsibilidad aniya nila na tapusin ang imbestigasyon upang makapagmungkahi ng legislative solutions anuman ang mga balakid.
Samantala, kabilang din sa mga dumating na resource persons na may kaugnayan sa isyu ng extrajudicial killings sa ilalim ng Duterte administration ay sina dating Iloilo City Mayor Jed Mabilog at dating Cebu City Mayor Tommy Osmeña.
