-Reymund Titong
KABANKALAN CITY, Negros Occidental — Nadiskubrihan sang mga katapo sang 79th Infantry Battalion ang ginapatihan kampo kag mga kagamitan sang New People’s Army (NPA) sa kabukiran sang Cadiz, sa northern Negros, sang tinalikdan nga Hulyo 16.
Suno sa mga militar, ang ila gina-alegar na diskubrihan ang resulta sang ila nagapadayon nga focused military operations, matapos ang ila ginpatigayon nga validation nga may mga presensya sang armado nga grupo nga naga pang-extort sa mga pumuluyo.
Samtang, ginpanginwala naman sang NPA nga may nadiskubrihan nga kampo sang hublag ang katapo sang militar, kundi isa ka gina-alegar ‘military raid’ sa Hacienda Flores sa Barangay Luna, pila lang ka kilometro gikan sa national highway sang syudad, kag imposibli nga mag ubra sila sang ila kampo sa amo nga lugar.
Nakit-an sa ginapatihan kampo sang NPA amo ang isa ka magazine sang M16 rifle, 30 kabilog nga live ammunitions sang M16 rifle, duwa ka duyan, duwa ka keypad nga cellphones, duwa ka military specs nga bag packs, tatlo ka sim cards, tatlo ka flash drives, isa ka flashlight nag may charger, lima ka utility ropes, pipila ka medical paraphernalia, personal nga kagamitan kag mga subversibo sa dokumento.
Pahayag ni Lieutenant Colonel Arnel P Calaoagan, Battalion Commander sang 79IB, ang nasambit nga operasyon ang natigayon bangud sang suporta sang mga lokal nga mga pumuluyo.
Madumduman nga una ginbalhag sang militar sa rehiyon nga ang Northern Negros Front sang NPA ang nabungkag na, kaupod man ang pagka-bungkag sang apat pa gid ka larangan sang NPA sa isla sang Negros.*
