NAKALATAG na ang seguridad sa kapulisan sa GenSan alang sa Semana Santa sunod semana. Matud ni PLt.Col. Aldrin Gonzales, tigpamaba sa General Santos City Police Office (GSCPO) naka-pukos ang seguridad sa bus terminals, airport, ug ubang lugar nga gikonsidera nga places of convergence.
Dugang ni Gonzales, laoman na sa publiko ang daghan pulis sa mga lugar sa GenSan atol sa semana santa. Ilawom sa PNP-full alert status, ang tanang leave ug day-offs sa police personnel ang awtomatiko nga gikansela ug tanang pwersa ang naka-standby sa mga presinto o kampo aron andam sa deployment.
Nakig-alayon na usab sila sa mga force multiplier sa siyudad aron makatabang sa paghatag og seguridad. Una nang, gibutyag ni Gonzales nga bantayan usab sa kapulisan ang mga beach resort ug pakusgan ang kampanya batok pagkalumos.
Base sa datus sa otoridad sa GenSan, Nakita nila sa mga nakalabay’ng tuig ang pagsaka sa ihap sa kaso sa pagkalumos atol sa semana santa. Karon pa lang nanawagan na ang kapulisan sa moadto og mga resort nga likayan ang pagkahubog ug dili biyaan ang mga bata nga walay nagbantay. I Richel Gubalani
