GIKABALAKA sa mga miyembro sa Sangguniang Panlungsod (SP) sa GenSan ang natala nga kaso sa pagpangabuso sa kababainhan. Partikular na ang natala nga kaso sa pagpangabuso sa babaye asa gitudlong mihimo sa engon mao ang traysikel.
Asa pipila ka kababainhan ang nagpaabot sa ilang reklamo batok traysikel drayber nga giabuso sila. Gawas niini, migula usab atol sa sesyon sa konseho nga pipila ka biktima sa sexual abuse ang wala gihatagan og maayong patratar sa pipila ka sakop sa Womens and Children Protection Desk (WCPD) sa pipila ka police precinct sa GenSan.
Migula usab sa sesyon nga dunay pipila sa nabiktima ang halos wala gihatagan og pagtagad sa otoridad sa ilang gipadangat nga sumbong.
Nagpagawas og kabalaka ang konsehal sa GenSan sa natala nga pagpangabuso sa babaye nga gikalambigit sa pipila ka traysikel drayber. Gitawag usab ang atensyon sa kapulisan nga tutukan ang insidente ug nanawagan sa mga ginikanan nga bantayan ang ilang mga anak.
Samtang, buot ni Konsehal Jane Rivera nga matama ang dili sumala pa maayong pagtratar sa pipila ka personahe sa kapulisan ngadto sa biktima sa pagpangabuso. Sa bahin usab ni PLt. Clarizel Perez, labaw sa Women’s and Children Protection Desk (WCPD) sa GSCPO, gitawag na nila ang atensyon sa mga WCPD personnel sa matag presinto.
Samtang sa gipresentang datus sa GSCPO, sulod sa tulo katuig nakatala sila og kinatibuk-ang 298 nga kaso sa rape ug act of lasciviousness. Gikan sa maong ihap sa sexual abuses, nakapasaka ang kapulisan og 38 ka kaso sa korte gikan sa kinatibuk-ang ihap, 217 niini ang kasong lugos samtang 81 ang act of lusciousness.
Samtang nakatala duna usab insidente sa sexual abuse nga wala napasaka sa korte tungod sa pagbalibad sa biktima sa pagpasang-ot og kaso. I Richel Gubalani
