Duha ka adlaw nalang gikan sa karon matapos na ang gihatag nga lugway sa Commission on Election alang sa extended voter registration alang sa 2022 National and Local Elections.
Sumala ni Police Capt. William Catipay, Deputy Station Commander sa Sta. Ana PNP, nga nagdugang silag mga personahe nga gipang muntar sa buhatan sa COMELEC Davao aron masigurong matuman ang Minimum Public Health Standard.
Gibana-banaang anaa sa 1,000 ka mga registrants ang magparehistro kada adlaw sa buhatan ilabi na karon nga nagaduol na ang ulahing adlaw sa pagparehistro.
Tungod niini padayong giawhag sa Comelec ang mga Dabawenyo nga wala pa nakaparehistro nga pahimuslan na ang duha ka adlaw nga nabilin sa rehistrasyon.
Alang sa unang distrito, padayong modawat ang satellite registration sa usa ka dakong mall sa Ecoland human nga kini gibalhin sugod niadtong LUnes.
Samtang ang mga rehistrante sa segundo ug ikatulong distristo, adto pa gihapon dawaton sa Comelec Office sa Magsaysay Park.
Wala nay ihatag pa nga ekstensyon ang Comelec paghuman ugma Oktubre 30, 2021 busa gilauman nga dagsaon kini sa mga gustong muhabol.
