Wala mapugngi ang luha sa inahan ug igsoon sa tinun-an nga si Michael Alcoseba, samtang nipaso kini sa 13th Commencement Exercises Sa Lapu-Lapu City College human nga graduation picture nalang niya ang ilang kuyog nga nipaso sa stage.
Kini tungod kay wala na makaabot sa adlawng sa iyang graduation si Alcoseba kinsa nipanaw niadtong Mayo 11.
Maong ang inahan ug igsoon nalang ni Alcoseba maoy nitungtung sa stage ug midawat sa iyang medalya ug certificate isip pag gradwar nga cum laude sa kursong BS Tourism Management.
Sa facebook post ni Mayor Junard Ahong Chan, nipadayag kini nga nanlimbawt ang iyang balhibo sa pagkakita niya sa inahan ug igsoon ni Alcoseba nga wala mapugngi ang luha sa dihang gitawag ang pangalan niini aron modawat sa iyang award.
Nasuta nga ang nipanaw nga tinun-an usa ka working student ug usa usab ka dance performer sa Lapu-Lapu City Performing Arts.
Makita usab sa facebook post sa igsoon ni Alcoseba nga si Juliet Hiyas, sa gibating kaguol sa ilang pamilya tungod kay wala na ang ilang igsoon aron personal nga mokuha sa iyang gihaguan. | Kristyl Joy Felerca