PATAY na nga naabtan sa iyang pamilya ang usa ka engineer human mibangga ang iyang sakyanan sa usa ka motorsiklo nga nagparking sa Diversion Road, Purok 18, Barangay Apopong. Giila ang biktima kang Renegio Estardo, 61-anyos, residente sa Asumption Village, Barangay Sinawal.
Sumala sa drayber sa motorsiklo nga si Vic Sanchez, 44-anyos padulong siya og Diversion Road aron sugaton ang iyang asawa gikan sa trabaho. Apan kalit kining nagub-an sa dalan maong mipadaplin siya sa kilid aron ayuhon ang iyang motorsiklo.
Nasayran nga nadala pa sa ospital ang biktima apan gideklara kining dead on arrival sa doktor. Matud sa igsoon sa biktima nga naila kang Elizabeth Mahinay wala sila magdahom nga ang drayber sa motor nga si Sanchez kaubanan sa trabaho sa iyang igsoon. ‘’karon pami kabalo nga ang nabanggaan saakong igsoon kauban pud niya sa trabaho, supervisor nila ba.
Mao na nga kami naghangyo nalang mi nga pamilya, so among nasabotan nalang kay dili man tinuyo nga ing-ana nakuan, gahangyo nalang me sa iyaha ba nga tabangan nalang me pinansyal. Bootan kaayo na akong igsoon, wala gyud kay masulti sa iyaha kay anytime kung naa lang na siya dili gyud sya dalok, unya friendly kaayo na sya. Wala gyud na syay nabal-an namo nga kalaban.
Mao na nga manghinayang lang me ba kay pila ka tuig namo nga wala siya nakauban kay gikan siya og abroad’’. Andam matud pa si Sanchez nga motabang sa hingtungdang pamilya. Sa kasamtangan ang duha ka motorsiklo sa mga nahisgotan nagpabilin sa kustodiya sa TEU, samtang nagpadayon ang transaksyon tali sa duha ka pamilya. I Enamie Mogpon
