ANGOL ang duha ka mga tricycle driver human nga nagdinunggabay sa dalan sa New Bohol, Calumpang hapon sa Hulyo 12.
Subay sa talaan sa Tambler PNP ang nahitabo, nag-away ang duha ka tricycle driver sa dalan sa New Bohol, Calumpang human nga nag- estoryahanay, ang usa may gunit nga kutsilyo samtang ang usa may starscrew mao nga nasamdan sila ug nadala sa Dr. Jorge P. Royeca Hospital.
Sa pasiunang imbestigasyon sa kapulisan pinaagi ni PCpl Michael Anthony Roma nagkita ang duha ka mag higala nga si John Cristopher Beltran ug Rodolfo Tanduyan Esguera samtang gasakay sa tricycle, gitawag ni Beltran si Esguerra unya nag-estorya, apan nisangko sa away.
Tungod niini nakita sa imbestigador nga posibling aduna nay daan nga bangi ang duha mao nga nagdinunggabay, nahitabo ang kremin alas tres pasado sa hapon Hulyo 12. ( Ever Diazon)
