Patay ang isa ka lalaki matapos ginbuno sang makapila ka beses sang iya nakabais sa Sitio Kalubihan, Brgy. Casanayan, Pilar, Capiz takna 11:25 kagab-i sang Domingo, Mayo 26.
Ginkilala ang biktima kay Reman Zacarias Galosmo, 37-anyos, residente sang Brgy. Sta Fe. Samtang ang ginatudlo suspek amo si John Erick Detaro, yara sa legal nga pang-edaron kag residente naman sang Sitio mahidaiton Brgy. Casanayan.
Sandig sa imbestigasyon sang Pilar Municipal Police Station, samtang yara ang suspek kag biktima sa guwa sang tyangge ni alyas Agnes, nag-angkon ang mga ini sang komosyon ukon pagbinaisay kun sa diin hinali nalang nagkuha sang kutsilyo ang suspek kag ginbuno ang biktima sa nawala nga kili-kili, nawala nga paa kag agtang.
Gindala ang biktima sa Bailan District Hospital apang gindeklara nga dead on arrival.
Madasig naman nga nagpalagyo ang suspek matapos ang nakumiter nga krimen. Sa karon, padayon pa ang pursuit operation sang kapulisan agud madakpan ang suspek.
