Miarangkada na ang 1st quarter payout sa programang Social Pension sa buhatan sa Department of Social Welfare and Development (DSWD) Field Office XI sa probinsya sa Davao Occidental.
Kapin 21,700 ka mga benepisyaryo sa maong probinsya ang makadawat sa ilang pensyon nga nagkantidad og P1500 alang sa bulan sa Enero hantod Marso sa 2022.
Pagasugdan na sab sa mga mosunod nga mga semana ang payout alang sa nahibiling benepisyaryo sa Davao Oriental, Davao del Sur, Davao de Oro, Davao del Norte, ug Davao City.
Ang mga benepisyaryo giawhag nga magpadala na lamang sa ilahang mga awtorisadong representate inubanan sa ilahang authorization letter, OSCA ID, ug valid ID sa nahisgutang representante. Kini luyo sa nagpadayon nga hulga sa COVID-19 dinhi sa nasud.
Sa tibuok aktibidad, ipatuman ang mga safety protocols sama sa social distancing ug kanunay nga pagsuot sa face mask alang sa kaayohan sa atong mga benepisyaryo.
Makadawat ang benepisyaryo sa Social Pension og P500 kada bulan ubos sa Republic Act No. 9994 o mas nailhan nga Expanded Senior Citizens Act of 2010.
Sa kinatibuk-an adunay 284,700 ka mga benepisyaryo sa maong programa dinhi sa rehiyon onse.
