Hiniling ng Department of Social Welfare and Development sa House Appropriations Committee na mabigyan ito ng mahigit P191-billion na pondo para sa 2022 kung saan ay kasama na rito ang pondo ng attached at supervised agencies.
Para sa Fiscal Year 2022 ay nasa mahigit P189-billion lamang ang budget na inilaan ng Department of Budget and Management para sa DSWD, hindi pa kasama ang mga attached agencies nito.
Kung hihimayin ay mapupunta ang pondo ng ahensya sa personnel services na nasa P9.2-billion, na mas higit ng P2-billion mula sa 2021 budget; sa MOOE na nasa P170-billion; financial expenses na nasa P388-million; capital outlay na nasa P364-million; at bayad para sa retirement at life insurance premium na nasa P146-million.
Kabilang sa mga programa ng DSWD ang Pantawid Pamilyang Pilipino Program na may pinakamalaking 2022 proposal na aabot sa higit P115-billion, na P9-billion na mas malaki kumpara noong 2021.
Meron rin proyekto ang DSWD na Social Pension for Indigent Senior Citizens, na may proposal na P23.5-billion para sa 2022, na bahagyang mas mataas kumpara sa P23.46-billion noong 2021.
Naiulat naman ng DSWD na pagdating sa social amelioration program ay nakamit na nila ang 100 percent Disbursement rate para sa SAP 1, SAP 2 at Bayanihan 2.
