PATAY ang drayber sa tricycle samtang samaron usab ang nagmaneho sa motorsiklo, human nagbangga-anay alas 5 ang takna sa buntag sa Poblacion Malapatan Sarangani Province.
Ang namatay nga drayber giila sa pangalang Anthony Abrasado, 37 anyos , taga Purok Pag-asa Brgy Santo Niño Koronadal City. Padulong matud pa kini sa glan kuyog ang iyang asawa ug duha ka anak. Dihang nabanggaan sa motorsiklo nga padulong sa Gensan nga gimanehoan ni Roy Dalongdong Aglobo, 25 anyos, taga Purok Colasi, Brgy Labangal General Santos City.
Sumala ni PMAJ Benjie Ancheta ang hepe sa Malapatan Police station, nangawat og dalan ang drayber sa motorsiklo rason nga nabanggaan niini ang tricycle. Tungod sa kainit sa makina sa tricycle nasunog kini ug naapil kasunog si Abrasado tungod naipit ang iyang tiil, gisulayan kini pagtabang sa mga tawo apan mikusog ang kalayo ug wala na siya maluwas.
Sa kasamtangan nagpabilin sa balay tambalanan ang asawa ug duha ka anak niini lakip usab ang drayber sa motorsiklo.
