PATAY ang driver sa motor human nga gikabangga ang SUV sa Digos-Makar road Brgy. San Jose Digos City partikular na duol sa usa ka Gasoline Station.
Nalambigit sa maong bangga mao ang XRM nga motorsiklo nga gimaneho sa usa kaRamil Laput Donayre , 40, nga taga- First Crumb St. Zone 2, Digos City ug ang SUV nga gimaneho ni Sharon Jean Torregosa Jesuro, 53, nga taga- Dagohoy St. Roxas Ext. Digos City.
Sa imbestigasyon sa Digos PNP, susamang gisubay sa duha ka mga sakyanan ang digos-makar road ug padulong ang motorsiklo sa Rizal Ave, samtang ang SUV padulong sa Hagonoy.
Susamang anaa sa inner lane ang duha ka sakyanan sa dihang miabot duol sa gasoline station, nawad-an og kontrol ang driver sa motor ug nalagbot kini padulong sa SUV nga maoy hinungdan nga nagsungag ang duha ka sakyanan.
Dali nga gidala sa Davao del Sur Provincial Hospital ang driver sa motor nga si Donayre, apan gideklara kining patay sa iyang attending physician.
Kasamtangan, padayon ang gihimong imbestigasyon sa otoridad sa nahitabong digrasya.
