Patay ang kandidato pagka barangay Kapitan sa Davao de Oro human gipusil sa wala mailhing suspek kagahapon sa buntag particular sa Brgy. Camantangan, Montevista, Davao de Oro.
Naila ang biktima nga si Alvin Bengil Garcia, 32 anyos, ulitawo, Brgy kagawad, residente sa Purok 2, Barangay Camantangan, Montevista, Davao de Oro.
Sa imbistigasyon sa Montevista Municipal Police Station nasayran nga nagbisita ang biktima sa Purok 4 kauban ang kandidato sa pagka barangay kagawad nga si Kagawad Jocelyn Montaño Agron, 50 anyos, minyo residente sa Purok 4 aron ianunsyo nga maglusad sila ug pulongpulong alas 4 unta kagahapon sa hapon.
Sa dihang mobalik na unta ang biktima ug ang angkas nga si Agron sa Brgy Camantangan Proper sakay sa iyang motorsiklo , pag abot sa Purok 1, kalit kining gipusil sa riding in tandem nga sakay sa color blue nga Honda XRM nga walay plate number gamit ang wala matinong kalibre sa armas.
Natumba ang motorsiklo ug nahagba ang mga biktima sa dalan samtang niikyas ang mga suspek padulong sa direksyon sa Brgy Canidkid.
Gidala ang biktima sa Dvo de Oro Provincial Hospital-MOntevista apan gideklarang patay na sa 10:21 sa buntag samtang ang backrider nga naka agom ug minor injuries ang nakagawas na sa ospital.
Nasuta sa imbistigasyon nga ang biktima nagbaton ug relasyon sa usa ka minyong babaye samtang ang iyang bugtong kaatbang sa pagka kapitan mao ang iyang suod nga iyaan.
Naglusad dayon ug hot pursuit ug dragnet operation ang MOntevista MPS sa koordinasyon sa 25th IB sa AFP kaabag ang ubang law enforcement units.
