Kumbinsido si Tourism Secretary Bernadette Romula-Puyat sa pahayag ng mga health expert ng gobyerno na ligtas ang no-quarantine rule para sa mga fully vaccinated na biyahero na darating sa Pilipinas.
Ginawa ni Puyat ang pahayag sa gitna ng nakatakdang pagsimula sa pagpapatupad ng no-quarantine policy para sa mga fully vaccinated returning overseas Filipinos (ROFs), sa pasilidad o tahanan.
Hindi na rin gagawing mandatory ang facility-based quarantine para sa ganap na nabakunahan na mga dayuhang manlalakbay mula sa mga bansang walang visa simula sa Pebrero 10, 2022.
Gayunpaman, binigyang-diin ni Puyat ang kahalagahan ng self-monitoring at pagsunod sa COVID-19 health protocols.
Sa ilalim ng bagong patakaran, ang mga ROF at international travellers ay dapat magpakita ng negatibong RT-PCR test na kinuha sa loob ng 48 oras bago umalis mula sa bansang pinagmulan at dapat mag-self-monitor sa loob ng pitong araw mula sa petsa ng pagdating.
