Catanduanes— Pigtawan doon ni First Catanduanes Electric Cooperative o FICELCO Information Officer Marvin Tapel na ang problema asin mga depekto sa planta kan Sunwest Water and Electric Company Inc. o SUWECO ang kawsa kan mga biglaang pagkawara nin suplay nin kuryente kan saindang mga miyembros konsumidores sa islang probinsya.
Sa iniluwas na pahayag kan kooperatiba, tig-pinaliwanag ni Tapel na tinuga mismo kan SUWECO na saindang power supplier na “plant related” ang rason kan mga na e-eksperyensiyang ‘momentary unscheduled power interruptions’ sa Catanduanes.
Segun kaya ki SUWECO Tech Engineer Daniel Pilones, naka set na an kapasidad kan saindang mga makina kaya ang nangyayari, nag fu-fluctuate an frequency kaini pag nagkakaigwa nin pagbabago sa load o sa demand.
Mga terminolohiyang teknikal, na sulamenteng an mga electrical engineers sana ang nakakasabot o nakaka interpreter alagad sa madaling sabi mga Ka-Brigada, konektado sa planta ang kawsa kan halos ara-aldaw na nararanasang brown out kan mga taga isla.
Dugang pa ni Tapel, kung an nangyaring brown out may kinaaraman sa parte kan FICELCO, tulos nindang maibabalik ang suplay nin kuryente huli ta kontrolado ninda ang sitwasyon.
Ipighalimbawa kan opisyal an nangyaring pagkawara nin kuryente sa parte kan Virac kaining nakaaging semana huli sa nadukayang tutong na halas na nagpurupot sa saindang linya, na tulos man nindang naaksyunan.
Sa huri, idinugang pa kan opisyal na nag promesa na ang SUWECO na papaandaron na kaini an saindang Hydro Power Plant bago magtapos ang bulan nin Agosto na nakalaag sa Brgy. Solong sa banwaan nin San Miguel.###
