BICOL—Pirmado na an Memorandum of Agreement (MOA) para sa paglansar kan programang inapod na Module Legends: 2D on-air Learning sa probinsya nin Albay kun sain gagamiton an radyo bilang medium of instruction.
Entre digdi an opisina ni Cong. Joey Salceda kan Segundo distrito, Team Albay Youth Organization (TAYO Inc.), Bicol Univeristy, DepEd Legazpi asin Albay Division asin an Youth Development Alliance Legazpi.
Sa lindong kan nasambit na programa, gagamiton an radyo bilang medium kan pagtukdo sa mga estudyante sa High School asin Kolehiyo para mas dakol na mga learners an maabot kaini.
Susog sa MOA, an opisina ni Cong Salceda an makikipag koordinar sa mga stakeholders kabali na an mga magiging partner na radio stations asin iyu man an makargo kan gastos para sa mga ini.
An TAYO Inc. iyu an maserbing secretariat kan proyekto, an DepEd Legazpi asin Albay iyu an madesignar kan mga paratukdo na matao nin discussion sa radyo kabali na an pagibo nin lesson plan asin mga topic na itutukdo, an Bicol University iyu man an madesignar nin mga propesor o instructor na matukdo on-air mantang ang YDA man makapot nin programa para sa intervention sa mga Out of School youth kabali na an pakikipag koordinar sa BU asin DepED para sa mga paratukdo, propesor o instructor na idedesignar na magtao nin discussion on-air.
An programang ini dakulang bagay suboot ngunyan na nasa tahaw nin pandemya an gabos ngani na dawa papano matabangan an mga estudyante na makaukod sa paagi kan radyo.
Ngunyan kaya suboot, bako pa man gabos kayang makasabya sa online learning huli ta bako pa man gabos abot nin makusog na internet o data connection. Apwera digdi, dakol pang tios na sektor an dae nin kakayanan na magbakal nin gadget para makasabay sa online learning.### || slm
