May pilang school buildings sa banwa it Kalibo ro iga-convert bilang quarantine facilities para sa covid-19 patients samtang padayun nga nagaabo ro kaso.
Pagagamiton ro mga classrooms sa Kalibo Elementary School ag Kalibo Integrated School Education Center sa Barangay Poblacion para malikawan ro pagdueotdutan sa mga gintaeana nga quarantine facilities.
Base sa pamunuan it LGU-Kalibo, ro nasambit nga mga eskwelahan hay nagakabagay para sa isolation ag nagasunod sa guidelines it Department of Health.
Ro Kalibo hay may isolation facilities sa Brgy. Poblacion, sa Brgy. Andagao ag Kalibo Regional Evacuation Center sa Brgy. Tigayon nga kung siin, nagaabot eon raya sa full capacity ag indi eon kayang magbatun pa it maabung pasyente it covid-19.
As of July 3, ro banwa it Kalibo hay naglista it 199 active cases kaeakip ro 23 admitted sa hospitals.
May 1,204 confirmed cases sa Kalibo, samtang 42 ro namatay bangud sa mga komplikasyon nga may kaangtanan sa Covid-19. / ANN DESLENE SALAZAR
