NAKAREKORD ang Department of Health (DOH) sa Soccsksargen region og taas nga kaso sa dengue karong tuiga tandi nakalabay’ng tuig.
Sa datus gikan sa DOH-12 gikan Enero hangtud Agosto ning tuiga nakarekord sila og 15,224 dengue case.
Taas kini og 45% tandi sa dengue cases nga natala nakalabay’ng tuiga sa susamang panahon samtang 56 death case ang narekord karong tuiga.
Kini ang rason sa pag-awhag ni Royfrextopher Boholst, DOH-12 Entomologist III nga manglimpyo sa palibot.
Gilayon usab nga magpa-konsulta sa labing duol nga health center sa lugar kung nakasinati na og duha kaadlaw nga kalintura.
Ang mga barangay sa rehiyon ang dunay trained nga denge response team, dugang ni Boholst.
Himoon usab ang 4S o ang search and destroy mosquito breeding grounds pinaagi sa pagyabo sa mga stagnant water ug mga containers; self-protection sama sa pagbutang og insect repellent ug pagsul-ob long- sleeved.
Samtang sa GenSan, gibutyag ni Dr. Lalaine Calonzo, labaw sa City Health Office nga ubos ang kaso sa dengue sa siyudad karong tuiga. I Richel Gubalani
