Inanunsyo ng Professional Regulation Commission (PRC) na nasa 733 lang mula sa 1,599 examinees ang nakapasa sa licensure examination for midwifery.
Kaugnay nito, si Ma. Isabella Navales ng Davao Medical School Foundation ang nanguna sa exam sa rating na 96.60 percent, na sinundan ni Hyacinth Pacano Bueno ng Isabela State University-Ilagan sa 89.55%, pangatlo si Jasmin Angelica Ocalo Ibalin ng Ago Medical & Educational Center-Bicol Christian College of Medicine sa 89.20%.
Samantala, ang mga top performing schools naman na may 15 o mahigit pang examinees na may 80 percent passing percentage ay ang Isabela State University-Ilagan (100%); St. Alexius College (95.65%); Ifugao State University-Potia (94.12%); Integrated Midwives Association of the Philippines Foundation School of Midwifery (80.95%); at Iloilo Doctor’s College (80%).
Ang pagsusulit na ibinigay ng Board of Midwifery ay isinagawa sa Manila, Baguio, Cagayan de Oro, Cebu, Davao, Iloilo, Koronadal, Legazpi, Lucena, Pagadian, Pampanga, Rosales, Tacloban, Tuguegarao, at Zamboanga.
Sinabi ng commission na ang registration para sa issuance ng Professional Identification Card at Certification of Registration ay gagawin online mula May 10 hanggang 23, 2022, pero ang mga successful examinees ay dapat personal na magparehistro at magsign in sa Roster of Registered Professionals. //MHEL PACIA-TRINIDAD
