Mokabat sa 9 million pesos ang damyos sa sunog human gilamoy sa kalayo ang kapin duha ka gatus ka mga balay nga gama sa light materials sa Blk 8 ug Blk 9, Muslim Village, Vista Mar Purok 11, Ilang, Tibungco, Davao City.
Nagsugod ang sunog alas 9:42 kagabii nga nilungtad hangtod pasado alas onse na sa gabii.
Sumala ni Police Major Noel Villahermosa, hepe sa Bunawan Police Station, nahinabi sa pulis ang witness nga si Amina Amil, nga silingan sa usa ka Alicia Caymo, sumala niini, nagsugod ang kalayo sa balay ni Caymo, 49 anyos, taga Blk 9, Muslim Village, Ilang, Tibungco.
Sa inisyal nga imbistigasyon, nakit -an ni Amil ang bana ni Caymo nga si Joseph Caymo nga nisulod sa ilang balay nga lango sa makahuog nga bino ug matud pa nag wild pa kini.
Human sa pipila ka sigundo, nisilaob na ang kalayo sa kusina nga bahin sa ilang balay ug nikuyanap na sa kasikbit nga mga kabalayan .
Nasayran nga karong adlawa, mao ang sumad o usa ka tuig nga anibersaryo sa nahitabong daku nga sunog sa mao gihapon nga area kungdiin gatusan nga mga pamilya ang naapektohan .Nagkinahanglan karon ug tabang ang mga apektadong pamilya sama sa pagkaon, tubig, mattresses, hygiene kits ug uban pa.