Nakakustodiya na sa himpilan ng pulisya ang dalawang kalalakihan na nangholdap ng dalawang katao matapos na masakote ng mga rumespondeng operatiba mula sa himpilan ng Labo MPS bandang alas 7:10 ng gabi nitong Agosto 9, 2021 sa HillCrest Subdivision, Brgy. Bulhao, Labo, Camarines Norte.
Sa ulat ng pulisya, bandang 7:30 ng gabi nang biglang dumulog sa Labo MPS ang mga biktimang sina “Edward” at “Shouvy’. Ayon sa salaysay ng mga biktima, sa nabanggit na oras at lugar habang sila ay naghihintay nang masasakyan, bigla umanong dumating ang dalawang lalaking may baril at nagsabing “Holdap ito!!! dapa!! dapa!! ibigay nyo ang mga cell phone at pera!!!” at puwersahang kinuha sa kanila ang kanilang mga cellphone. Matapos ang insidente, ang mga suspek ay nagmadaling umalis sa lugar sakay ng isang pampasaherong tricycle
Sa takot ng mga biktima, agad nga silang humingi ng saklolo sa mga pulis na agaran namang umaksyon sa kanilang sumbong. Kasama ng dalawang biktima, mabilis na nagsagawa ng hot pursuit operation ang mga operatiba ng Labo MPS na nagresulta sa pagkaka-aresto ng dalawang holdaper bandang 9:15 ng gabi sakay ng isang Honda motorcycle na may sidecar na positibong itinuro ng mga biktima.
Ang mga suspek ay nakilalang sina VELMAR ORTUA Y MAŃAGO, 20 anyos, binata, walang trabaho at si ROEL ORTUA Y PAITAN, 18 anyos, binata walang trabaho at pawang mga residente ng Purok 2, Barangay Malasugui, Labo, Camarines Norte.
Nakuha sa mga suspek ang mga ebidensya na isang malliit na kulay asul na sling bag na naglalaman ng tatlong (3) yunit ng cellphone(Samsung at Huawei na pagmamay-ari ng mga biktima at isang Infinix cellphone na pagmamay-ari ng isa sa suspek);Isang pirasong pabango, isang lighter at isang baby powder; Dalawang (2) maliit na piraso ng selyadong pakete ng hinihinalang ‘shabu’; at Isang (1) replica ng kalibre 45 na baril.
Ang mga suspek ay agad na dinala sa Labo MPS upang kaharapin ang mga kaso para sa robbery hold-up at paglabag sa Section 11, Article II ng RA 9165.
(photo courtesy: CNPPO)
