Pinatawan ni Ombudsman Samuel Martires ang preventive suspension sa mga kinauukulang opisyal ng Department of Agriculture (DA) at Food Terminal Inc. (FTI) dahil sa umanong anomalya sa pagbili ng sibuyas para sa mga Kadiwa stores.
Kaugnay rito, sinuspende ng anim na buwan na walang bayad ang limang opisyal na sina Assistant Secretary Kristine Evangelista, Administrative Officer Eunice Biblanias at Chief Accountant officer in charge Lolita Jamela, gayundin ang Vice president for operations ng FTI na si John Gabriel Benedict Trinidad III at Budget Division head Juanita Lualhati.
Ayon kay Martires, may memorandum of agreement (MOA) ang DA at FTI sa Kadiwa food hub project; habang ang FTI ay nagkaroon din ng agreement sa Bonena – multipurpose cooperative para sa delivery ng 8,845 na sakong sibuyas.
Dagdag pa ni Martires, ‘kwestyunable’ ang deliveries ng Bonena at hindi ito alinsunod sa MOA.
Sa huli sinabi ng ombudsman na malakas ang ebidensyang hawak nila laban sa limang kinauukulan.
