KALIBO, AKLAN—Nagpanawagan do pamunuan it Civil Service Commission (CSC) 6 sa mga examinees it owa nadayon nga Career Service Examination Paper and Pencil test ku nagtaliwan nga dag-on nga bue-on do andang Php 500 nga ginbayad para nasambit nga test.
Suno sa CSC 6, nakataeana kunta ku Marso 15,2020 do schedule it eksaminasyon apang owa raya nadayon bangud sa COVID-19 pandemic ngani nga nagpaguwa it resolution do head office it Civil Service Commission nga ipa-refund lang do ginpangbayad it mga nagparehistro.
Samtang, nasayuran nga sa Region 6 hay may una nga 22,790 nga mga indibidwal do nagpa-rehistro ag 7,630 pa eang kara do nakabuoe it andang refund hasta ku July 2021 ngani nga nagaabot pa sa 15,000 do dapat nga mataw-an it refund.
Nasayuran nga puwedeng magbuoe it andang refund sa an-um nga field offices it CSC 6 kung siin may opisina sanda sa Kalibo,Aklan, Sibalom Antique, Capiz Provincial Capitol sa Roxas City, Fort San Pedro sa Iloilo, Jordan sa Guimaras, ag Bacolod City sa Negros Occidental. // SHERRY ANNE REUNIR-VIDAL
