Limitado ang pagtanggap ng mga opisina ng Commission on Elections sa Isabela ng mga indibidwal na magpa-file ng kanilang Certificate of Candidacy ngayong araw hanggang October 8, 2021 dahil sa umiiral na quarantine restrictions.
Sa panayam ng 92.9 Brigada News FM Cauayan kay Atty. Manuel Castillo, ang Provincial Election Supervisor ng Isabela, mula ngayong araw hanggang October 8 ay bukas mula alas-8 hanggang alas 5:00 ng hapon ang kanilang mga opisina para sa mga kandidato ngunit tiniyak nito na one at a time lamang ang tatanggapin o hanggang dalawa lamang ang maaring kasama.
Aniya, kinakailangang kumpleto ang COC at dokumento ng mga kakandidato habang ang mga nagpositibo naman sa COVID-19 ay maaari pa ring magfile ng COC sa pamamagitan ng kanilang representative.
Samantala, ayon pa kay Atty. Castillo nagdagdag na rin sila ng personnel o election job order casual na siyang tututok sa pagsunod ng health protocols lalo na aniya ang social distancing.
Habang idadala naman sa law department sa Manila ang COC ng mga indibidwal na nagfile upang masuri ito ng maayos.
