WALA nay labot ang Comelec sa mga campaign posters nga anaa sulod sa private property.
Kini ang giklaro ni Clint Dumaguit, ang tigpamaba sa Comelec-GenSan basta i-secure lang ang mga nahisgutang campaign posters tungod dili usab nila kini hilabtan sa ilang himuong Oplan Baklas karong Marso 31.
Dugang ni Dumaguit nga apil na sa ilang langkaton ang mga posters sa national ug mga local candidates nga wala sa common poster areas ug wala nasubay sa hustong sukod.
Magsugod sa Marso 25 ang pagpangampanya sa mga local candidates, asa gipahibalo na sa tanang guidelines nga anaa sa ilang websites aron magiyahan sa ilang mga himuon ang mga kandidato.
Sa Fair Election Act, ang sukod nga gitugutan sa streamers anaa sa 3 feet by 8 feet ug posters sa 2 feet by 3 feet ug ang mosobra ang ilang tangtangon kung kini nabutang sa common poster areas. Samtang sa paggamit sa social media, kada kandidato kinahanglang iparehistro ang ilang official account ug tanang nagastos ang maapil sa SOCE kun Statement of Contribution and Expenditures.
