Gilaumang makabalik na ang Commission on Elections-Davao Region sa pagpahigayon og voter’s registration sa higayon nga matanggal na ang modified enhanced community quarantine (MECQ) status sa Davao City.
Sa oras nga ma-lift na ang implementasyon sa MECQ, gilayong ibalik sa komisyon ang pagdawat og mga kliyente aron maapas ang gilaraw nga ihap sa mga registrants ayha matapos karong September 30, 2021.
Gikabalaka sa opisyal ang pagdagsa sa mga kliyente sa subli unyang pagbalik sa operasyon busa ipatuman ang cutoff system aron malimitahan ang gidaghanon sa mga aplikante.
Una nang giluwat ni Atty. Gay Enumerables, Comelec-Davao assistant regional director, nga daghan pa ang pending application nga angay atimanon sa pagbalik sa pisikal nga operasyon.
Kahibaluang bisan pa man nga gihatagan sa City Government of Davao og exemption ang Comelec-Davao gikan sa Executive Order No. 30 nga naga-limita sa tanang aktidad sa mga pampublikong opisina, apan tungod sa MECQ implementation sa sukad June 5, 2021 suspendido gihapon ang registration.
Gikan 2020 hangtud June 30, 2021, nakaproseso na og 247,246 applications ang Comelec nga gilangkuban sa new registrations, reactivation sa voter’s accounts, ug transfer of polling precincts. BNFM-DAVAO
