DUHA ka motorsiklo ang nadawat sa City Mobile Force Company sa General Santos City Police Office gikan sa Brigada Group of Companies kagahapong adlawa.
Ang maong duha ka motorsiklo nga CRF 150LL gihatag sa CMFC sa gipahigayong turn over ceremony sa Brigada complex sa pagpanguna ni Madam Yelcy Yasay Catulpos, Executive Vice President ug ubang opisyal sa Brigada Group.
Pinaagi usab ni Atty. Froebel Kan Balleque gipadangat ang mensahe ni Brigada Group CEO-President Elmer V.Catulpos asa gipasalamatan sa Brigada ang mga kapulisan sa pagmintina sa seguridad ug kalinaw sa syudad. “This is our humble contribution in making Gensan a safe city to live in,” segun ni Atty. Kan.
Anaa usab si Police Lt. Co. Eric de Venancio, CMFC commander aron dawaton ang maong duha ka motorsiklo.
“This will be used in patrolling every day and night in securing the safety of every Generals,” segun pa sa nahisgutang opisyal.
Tumong sa paghatag og motorsiklo sa Brigada nga makatabang sa pagmintina sa seguridad sa GenSan ug pag-monitor sa mga suspek sa mga insidente sa pagpamusil gawas pa sa pagpasalamat sa nahimong kontribusyon sa kapulisan dili lang sa kompanya ingon man sa komunidad.
Nasayran nga ning bulan lang sa Hulyo, duha ka shooting incident ang natala ug sukad niadtong Enero ning tuiga, mokabat na sa 28 ang insidente sa pagpamusil.
Ang CMFC unit ang maoy ginatahasan sa GSCPO sa pagpahigayon og Pagpatrolya aron sa pag-monitor sa mga makadudahang aktibidad ug sa pagsiguro sa kaluwasan sa publiko.
