GIPAILAWOM na sa Rapid Antigen Test ang mga priso sa Lagao Police Station human nga may unang nagpositibo sa milabay nga semana sa RT PCR Test.
Sa kumpermasyon gikan kay City health Assistant Head Dr. Lalaine Calonzo, Hulyo 5 ang gitakdang petsa alang sa unang test sa tanang priso sa presento tres aron masuta kon positibo o negatibo sila sa Covid-19 virus.
Samtang sa pahayag sa labaw sa estasyon nga si PM Yol Hilado sumala niini nga tanang detainee ang gi-swab nga gilangkuban sa 26 ka mga priso babaye ug lalaki ,kon magpositibo ang tanan sa selda lang gihapon magpabilin ang mga detainees.
Ang unang nagpositibo nagpabilin sa isolation facility sa Barangay Lagao, piniriso kini nga gidakop sa kapulisan gumikan sa reklamong pagpanglugos og dose anyos unya napasakaan na og kaso sa korte.
Gidugang ni Hilado nga dili lang priso ang gi-swab test kondili lakip ang usa ka desk officer sa ilang presento,regular man daw ang ginahimo nga swab test sa kapulisan matag semana sa Regional Office.
Samtang sa iyang bahin nga labaw sa Lagao Police Station kaduha na test ug nagnegatibo sa Covid-19.
Malaumon usab si Hilado nga dili tanan ang magpositibo sa mga priso kay ginapasul-ob nila og mask ang mga priso, ginasusi buntag hangtud hapon unya gina-monitor ang temperature ug ang may mga sintomas. ( Ever Diazon)
