GIKUMPERMA sa usa ka opisyal sa City Traffic Enforcers nga si Michael Gomez nga nagapadayon ang ilang mga panagatagbo ug pagplano kung unsa ang ilang himoun aron mapahapsay ang trapiko sa mga nag-unang kadalanan usa niini sa J. Catolico Avenue.
Sumala kay Gomez nga daghan ang naapil sa mga lakang dili lang ang taga City Traffic Office kondili apil ang ubang opisina sama sa Engineering, Public Safety Office ug sa mga establisemento nga apektado aron nga hiniusa ang ilang desisyon sa mga problema nga angay solusyonan.
Usa sa ilang lakang ang pagtangtang sa usa sa ilang gibutang nga barikada atbang sa usa ka mall nga nakaharang sa pedestrian samtang under observation pa nila ang epekto sa laing barikada sa J Catolico Avenue.
Gidugang ni Gomez nga ilaha lang ginaplastar ang loading ug unloading areas aron maanad ang mga sumasakay sa saktong lugar.
Kahibaluan nga gibatikos sa pipila ka opisyal sa transport sector ang pagbutang og kural sa pedestrian atbang sa usa ka mall,lakip mga establisemento nga apektado mao nga gitangtang usab dayon sa taga City Traffic ang kural ug ma-agihan na sa mga tawo.
Panawagan usab ni Gomez sa mga driver nga musunod nalang sa balaud trapiko labaw na sa loading ug unloading areas aron nga makatabang sa pagpatunhay sa trapiko, dili usab daw tanang kanto ilang mabantayn gumikan sa kakulang sa personahe nga magbantay. ( Ever Diazon)
