WALAY pagsupak sa ordinansa nga bag-ong na-aprubahan sa konseho batok sa pataka nga paglabay sa mga basura nga may kalabotan sa COVID-19 Related Materials.
Sumala sa usa ka negosyante nga si Engr. Manny Yaphuckon maayo ang tumong sa ordinansa kay tinuod nga daghan ang pasaway nga wala nagapahaluna sa ilang mga basura sa saktong butanganan, bisan siya makakita og facemask nga nagalutaw sa dagat.
Sa ilaha nga bahin naga patuman gayod sila sa saktong segregation labaw na sa COVID-19 Materials sama sa facemask ug faceshield.
Gidugang ni Yaphuckon nga kinahanglanon ang mao nga ordinansa sa pagsugod pa sa pandemya hangtud niining panahuna ug mas maayo nga adunay multa nga ipahamtang niini.
Ang hagit lang daw niini kung paunsa mapatuman sa syudad ang mao nga ordinansa kon malagdaan na.
Kahibaluan nga na-aprubahan na sa ikatulong pagbasa sa konseho ang sugyot balaudnon nga nagahatag giya sa saktong paglabay sa COVID-19 Related Materials ug nagamando nga dapat ipalahi ang sudlanan niini ug ang masakpan nga makasupak may multa nga P500 pesos. ( Ever Diazon)
