NAGHATAG dugang pagpaklaro ang labaw sa City Accounting Office kalabot sa payroll sa labaw sa Office of Senior Citizens Affairs nga si Celso Mendoza kon ngano nga wala na nila giproseso.
Sumala kay City Accounting Head Rhesababes Sumalpong kaniadtong Oktubre 19 adunay gi-submit nga papelis alang sa payroll ug suportado sa daily time record ni Celso Mendoza alang sa sweldo niini sa bulan sa Septembre tuig 2021.
Apan wala kini giproseso sa ilang opisina, sa rason nga hangtud tulo ka tuig lang ang termino sa labaw sa OSCA ug wala nay reappointment, unya ang DILG Circular nga tulo ka bulan lang ang lugway kon gikinahanglan.
Tungod niini gibalik daw sa accounting ang papelis nga gi-submit kanila sa taga OSCA alang sa sweldo ni Mendoza ug human sa October 19 wala nay nisunod nga papelis.
Samtang nangutana usab daw ang secretary ni Mendoza kon pwede pa sila magpasa usab alang sa payroll ang tubag sa taga Accounting wala nausab ang hukom sa ilang opisina luwas lang kon may balaud nga magtugot niini bisan lampas na sa termino.
Sa bahin sa Human Resource Office sumala sa labaw nga si Leah Tolimao ang labaw sa OSCA wala naga-agi sa ilang opisina ang appointment apan ang supervison ilawom sa buhatan sa mayor samtang ang function sa opisina ginagiyahan sa taga City Social Welfare and Development Office kon CSWD.
Samtang sa bahin sa kanhi labaw sa OSCA nga karon naga-function isip Consultant Coordinator nga si Lydia Tobola sumala niini nga adunay balaud sa termino sa labaw sa OSCA apan wala dayon kapahigayon og piniliay gumikan bawal ang panagtapok,samtang atangan nalang daw ang hukom sa opisina sa Mayor kon magpahigayon na og election aron may bag-ong matuboy nga labaw sa mga senior citizen sa Gensan.
Sa kumpermasyon usab sa kanhi labaw sa CSWD sumala ni Rebecca Magante nga kaniadtong Septembre aduna nay request alang sa election sa OSCA apan subject for legal opinion pa sa City Legal Office. ( Ver Diazon)
