NAMATAY ang usa ka driver sa motorsiklo human nakasugat og disgrasya sa Diversion road kanto Conel road alas 11 sa gabei Nobyembre 10 tuig 2021.
Subay sa talaan sa Traffic Management Unit ang biktima naila sa pangalang Alejon Mangkinam Payag, 27- anyos, ulitawo nga taga Phase 2, Block 7, Foremost Village, Apopong, Gensan.
Nagamaniho og motorsiklo nga Yamaha 125 si Payag gikan sa Barangay Katangawan latas sa Diversion Road apan sa pag-agi sa kanto Conel Road nabangga sa tricycle nga nitabok sa Diversion road, nalagpot ug naligid ang biktima kuyog sa iyang motorsiklo mga 20 metros.
Naangol si Payag ug gidala sa patrol sa Barangay Conel sa Diagans Hospital apan gideklara sa doctor nga namatay na.
Samtang ang driver sa tricycle nga si Antonio Flores, Jr. 30-anyos, usa ka security guard nga nagpuyo sa Purok 9, Conel, wala maunsa, ang atubangan nga bahin lang sa tricyle ang may damyos, gikustodiya usab kini sa taga TMU.
Sa paghinabi sa 89.5 Brigada News FM Gensan kay Flores sumala niini nga gikan siya sa fishport kung asa siya naga-duty isip gwardiya apan sa pag-abot niini sa lugar sa nahitaboan, nagkumpyansa siya nga motabok kay nihunong ang duha ka sakyanan nga palahos sa Diversion road, sa iyang pagtabok nabangga sa iyang ligid sa unahan ang biktima ug nalagpot sa layo.
Gidugang ni Flores nga nagapangayo usab siya og dispensa sa pamilya sa biktima ug mohangyo nga aregluhon ang nahitabo kay wala man daw niya kini gituyo og wala usab siya naka-inum niadtong panahona. ( Ver Diazon)
