ANGAYANG tabangan sa mga barangay, dili lang Office of the Senior Citizens Affairs o OSCA ug DOH nga maengganyo ang mas daghan pang mga senior citizens nga magpabakuna batok COVID-19.
Kini ang gibutyag ni Celso Mendoza, kanhing OSCA head sa GenSan ug karon development officer IV sa LGU-GenSan nga wala pa nakab-ot ang igong ihap sa mga senior citizens nga nabakunahan.
Segun ni Mendoza nga daghan ang mga rason nganong gamay lang ang ihap sa mga senior citizens ang nabakunahan batok COVID-19, sama sa may edad na sila ug hapit na usab mobiya sa kalibutan, impluwensya sa ilang mga anak nga medyo luya na ug basin makadaut pa sa ilang panglawas ug uban pang mga rason.
Nasayran nga nagpabilin nga anaa sa alert level 1 ang GenSan sa COVID-19.
Dugang pagbutyag ni Mendoza nga nagpahigayon sila og consultative meeting kauban ang mga health officials sa syudad ug rehiyon ug anaa usab ang mga presidente sa mga senior citizens sa 26 ka barangay aron sayron ang hinungdan nganong daghan ang wala nabakunahan sa maong sector.
Aminado usab si Mendoza limitado ang information campaign ug gusto nga ilambigit ang barangay aron motaas ang ihap sa mabakunahan nga mga senior citizens.
