BNFM BICOL—Nakiulay an Catanduanes Medical Association sa Municipal IATF kan Virac sa probinsya nin Catanduanes na higutan an pagpautob kan mga COVID-19 restrictions sa saindang banwaan.
Iniyo huli naman ngani sa nagpapadagos na paglangkaw kan mga nairerehistrong kaso nin COVID-19 sa isla, urog na sa kabiserang banwaan kung sain basado sa pinakahuring report kan Provincial Health Office, nasa 139 pa an mantenidong aktibong kaso nin helang sa Virac gikan sa 725 na mga naikurit na kumpirmadong kaso.
Huli ngani kaini, pinunan nang liwat na ipautob kan gobyerno lokal kaning nakaaging Lunes an curfew asin liquor ban sa nasabing lugar komo saro sa mga lakdang para dawa parapapano maibitaran o kaya man mabawasan an paglakop kan corona virus.
Sa ibinabang kasuguan kan alkalde nin banwaan na si Mayor Posoy Sarmiento, nagdudurar an curfew puon alas 10:00 nin banggi hasta alas 4:00 nin pagkaaga kung sain sulamenteng mga essential workers sana ang pigtutugutan na magluwas tuyong banggi, arog kan mga medical asin security personnels; mga government officials, mga empleyadong may night shift duties asin iba pang mga personahe na nanginginot sa pag mantenir nin paz y orden.
Ipigbabawal man an pagpabakal, pagbakal asin pag inom nin arak. An siisay man na mabalgar sa kasuguan na iniyo pu-pwedeng sangatan nin penalidad huli sa dae pag-utob kan mga nabangit na protocols.
Sa huri ipinakikiulay man kan nasabing asosasyon sa publiko na gibuhon an saindang parte sa pagpababa nin mga nairerehistrong kaso urog na ta paranu na ang kapasidad kan mga COVID wards asin COVID isolation sa mga mayoryang ospital sa probinsya, mantang paragal naman ang mga health workers asin an iba sa mga ini, nauulakitan pa nin nakagagadan na virus rason para mapilayan an workforce kan mga frontliners.###
